Wednesday, March 22, 2017

ഓര്‍‌മ്മയില്‍ നിന്നൊരു പഴങ്കഥ

എന്റെ ബാല്യകാലത്തെ ഓര്‍‌മ്മകളില്‍ നിന്നും ചില ചിതറിയ ചിത്രങ്ങള്‍ പങ്കു വെയ്‌ക്കുകയാണ്‌.ബന്ധുക്കളില്‍ നിന്നുള്ള ചിലര്‍ പ്രസ്‌തുത ചിത്രങ്ങള്‍‌ക്ക്‌ അല്‍‌പം കൂടെ നിറം പകര്‍‌ന്നു നല്‍‌കിയപ്പോള്‍ കുറച്ചു കൂടെ വ്യക്തത കൈവരിക്കാന്‍ കഴിയുന്നുണ്ട്‌.രണ്ടാം തരത്തില്‍ പഠിച്ചു കൊണ്ടിരിക്കുമ്പോഴാണ്‌ ഓര്‍‌മ്മയ്‌ക്ക്‌ ആസ്‌പദമായ സം‌ഭവം.കൃത്യമായി പറഞ്ഞാല്‍.അന്നെനിക്ക്‌ എട്ടു വയസ്സ്‌ പ്രായം.മുസ്‌ലിം ആണ്‍‌കുട്ടികളുടെ ചേലാ കര്‍മ്മങ്ങള്‍ അധികവും സ്ക്കൂളിലും മദ്രസ്സയിലും ഒക്കെ ചേര്‍‌ത്തിയതിന്റെ ശേഷമായിരുന്നു നടത്തിയിരുന്നത്.മാര്‍ഗ കല്യാണം എന്നായിരുന്നു അക്കാലത്ത്‌ ഇതു അറിയപെട്ടിരുന്നത്.ചേലാ കര്‍മ്മം കഴിഞ്ഞ്‌ മുറിവുണങ്ങി കുളിക്കുന്ന ദിവസം ഒരു ആഘോഷം തന്നെയായിരുന്നു നടമാടിയിരുന്നത്.അവരവരുടെ സാമ്പത്തിക സ്ഥിതിയനുസരിച്ചു്‌ ആഘോഷപ്പൊലിമയില്‍ ഏറ്റക്കുറച്ചിലുകളൊക്കെ ഉണ്ടാകുമെന്നു മാത്രം.ആഘോഷ ദിവസം പട്ടവും പടവും കെട്ടി അണിഞ്ഞൊരുക്കിയ ആനയും കൊട്ടും പാട്ടും വാദ്യ മേളങ്ങളും ഒക്കെ ഒരുക്കുന്നവരും ഉണ്ടായിരുന്നു.കുളിപ്പിച്ചൊരുക്കിയ ബാലനെ ആനപ്പുറത്തിരുത്തി ആഘോഷത്തോടെ പള്ളിയില്‍ കൊണ്ടു പോകുന്ന പതിവും സാധാരണമായിരുന്നു.മഹല്ലിലെ ഒസ്സാനായിരുന്നു ചേലാ കര്‍‌മ്മം നടത്തിയിരുന്നത്.അക്കാലത്ത്‌ പെണ്‍‌കുട്ടികളുടെ കാതു കുത്ത്‌ കല്യാണവും ഇതു പോലെ ആഘോഷ പുര്‍‌വ്വം നടത്തപ്പെട്ടിരുന്നു.
അന്നൊരു ദിവസം എന്റെയും ഇക്കയുടേയും ഊഴമായിരുന്നു.വരാന്തയിലെ തിണ്ണയില്‍ ഒരുക്കിയ മജ്‌ലിസില്‍ ഉസ്‌താദുമാര്‍ മൗലിദ്‌ പാരായണം തുടങ്ങി.ഇക്കയെ അനുനയിപ്പിച്ച്‌ കോണി മുറിയിലേയ്‌ കൊണ്ടു പോകുന്നതു കണ്ടു.പങ്ങി പങ്ങി മെല്ലെ ഉള്‍‌വലിഞ്ഞ്‌ തിരിമുറിഞ്ഞ്‌ ഞാന്‍ ഓടി തൊട്ടടുത്തെ മാക്കിരിപ്പറമ്പിലെ എന്റെ സഹപാഠിയുടെ വരാന്തയിലെ ചകിരി കെട്ടിന്റെ പിന്നില്‍ ഒളിച്ചിരുന്നു.എങ്കിലും അന്വേഷണ സംഘത്തിന്റെ പിടിയില്‍ നിന്നും രക്ഷപ്പെടാനായില്ല.
ചീന്തിയ ഈര്‍‌ക്കിള്‍ ചെറിയ വൃത്തം തീര്‍‌ത്ത്‌ ലിംഗത്തിന്റെ അഗ്ര ചര്‍മ്മത്തില്‍ പ്രവേശിപ്പിച്ച് മോതിരക്കണ്ണിയിലേയ്‌ക്ക്‌ ചര്‍‌മ്മം ചുരുട്ടിക്കയറ്റുകയാണ്‌ വിദഗ്‌ദനായ ഓസ്സാന്‍ ചെയ്യുന്നത്.മൂന്നാം ദിവസമാകുമ്പോഴേയ്‌ക്കും മുറിവിന്‌ ഉണക്കം വന്നിരിയ്‌ക്കും.മുറിവില്‍ ചുറ്റിയ നേര്‍‌ത്ത തുണി എല്ലാ ദിവസവും പുതുക്കി ചുറ്റും.ഇങ്ങനെ മൂന്നാം ദിവസമായാല്‍ മൂന്നാം ശീല എന്ന പേരില്‍ പ്രസിദ്ധമായിരുന്നു.ബന്ധു മിത്രാധികള്‍ പലഹാരങ്ങളും പഴങ്ങളുമായി വന്ന് വിരുന്നും സത്കാരങ്ങളും ഒക്കെയായി മൂന്നാം ശീല പൊടി പൊടിയ്‌ക്കും.പിന്നീട്‌ മുറിവൊക്കെ നന്നായി ഉണങ്ങി കുളിച്ചൊരുങ്ങി കാരണവന്മാരുമൊത്ത്‌ പള്ളിയില്‍ പോകുന്ന ദിവസമാണ്‌ സാക്ഷാല്‍ ആഘോഷം.
ഗ്രാമത്തിലെ പടിഞ്ഞാറെക്കരയിലെ വിശാലമായ വയലോരത്ത്‌ നിസ്‌കാര പള്ളിയോട്‌ ചേര്‍ന്നാണ്‌ ഞങ്ങളുടെ വീട്.വേനല്‍ കാലത്ത്‌ ഉണങ്ങിക്കിടക്കുന്ന വയലില്‍ വലിയ ആഘോഷമൊരുക്കിയുള്ള മാര്‍‌ഗ കല്യാണപ്പെരുമ ഓര്‍‌മ്മയില്‍ മിന്നുന്നുണ്ട്‌.ഇത്തരം ആഘോഷങ്ങളുടെ പ്രായോജകരാകാനുള്ള അവകാശം അമ്മാവന്മാരില്‍ നിക്ഷിപ്‌തമായിരുന്നു.അക്കാലത്തെ പ്രസിദ്ധങ്ങളായ സകല വാദ്യ മേളങ്ങളും ഞങ്ങളുടെ മാര്‍ഗ കല്യാണത്തിന്‌ ഉണ്ടായിരുന്നു.കൂടാതെ മാപ്പിളക്കലയിലെ പേരുകേട്ട ദഫ്‌ മുട്ടുകാരും, മുട്ടും വിളിക്കാരും, കോല്‍‌ക്കളിക്കാര്‍ വേറെയും.കോയമ്പത്തൂരില്‍ നിന്നും തീവണ്ടി മാര്‍‌ഗം കൊണ്ടു വന്ന രണ്ട്‌ കുതിരകള്‍ അക്കാലത്തെ വിശേഷപ്പെട്ട ചര്‍‌ച്ചയായിരുന്നു.കുളിപ്പിച്ചൊരുക്കി കസവു തുണിയും ജുബ്ബയും ജിന്നത്തൊപ്പിയും അണിയിച്ച് കുതിരപ്പുറത്ത്‌ വാദ്യമേളങ്ങളുടെ അകമ്പടിയോടെയായിരുന്നു വലിയ പള്ളിയിലേയ്‌ക്ക്‌ പോയത്.പള്ളി മുറ്റത്തെത്തി ഹൗദിലെ ചിരട്ട കൈലു കൊണ്ട്‌ വെള്ളം കോരി കാലു കഴുകി പള്ളിയില്‍ കയറി അം‌ഗസ്‌നാനം ചെയ്‌തു രണ്ട്‌ റക‌അത്ത് നിസ്‌കരിച്ച്‌ വീട്ടിലേയ്‌ക്ക്‌ മടങ്ങി.പള്ളിയിലേ്‌ക്കുള്ള പോക്കും വരവും ആസ്വദിക്കാന്‍ വലിയ ആവേശത്തോടെ നാട്ടുകാര്‍ തടിച്ചു കൂടിയിരുന്നു.സന്ധ്യവരെ നീണ്ടു നിന്ന വിവിധ വാദ്യപ്പെരുക്കങ്ങളും കൊട്ടും മേളവും ഒരു നാടിന്റെ തന്നെ ഉത്സവക്കാഴ്‌ചയായിരുന്നു.എല്ലാം ബഹളങ്ങളും ഒരു വിധം ഒതുങ്ങിയപ്പോള്‍ വാത്സല്യത്തോടെ അരികിലേയ്‌ക്ക്‌ ചേര്‍ത്തു പിടിച്ച്‌ ഉപ്പ പറഞ്ഞു. 'ന്റെ മോനിപ്പം വല്യ ചെക്കനായി ഇനി നേരത്തിന്‌ പള്ളിയില്‍ പോയി നിസ്‌കരിക്കണം....'ഗൃഹാതുരത്വം നിറഞ്ഞ ഒരു കാലഘട്ടത്തിന്‌ വിട.
ഇന്ന്‌ കാലം എത്രയോ മാറി.നമ്മുടെ കോലവും.ആതുരാലയങ്ങളും ആധുനിക സൗകര്യങ്ങളും വികസിച്ചപ്പോള്‍ ദിവസങ്ങള്‍ മാത്രം പ്രായമുള്ളപ്പോള്‍ തന്നെ ചേലാ കര്‍‌മ്മം നടന്നു വരുന്നു.ആനയും അമ്പാരിയും ആഘോഷങ്ങളും എല്ലാം പഴങ്കഥ...

Wednesday, March 15, 2017

കണ്ണി മുറിയാത്ത വൈദ്യ വിശേഷം

സുപ്രസിദ്ധനായ പാരമ്പര്യ ഭിഷഗ്വരന്‍ അമ്മുണ്ണി വൈദ്യരുടെ മകനാണ്‌ പ്രദേശത്തെ ഏറെ പ്രസിദ്ധനായിരുന്ന ഹാജി കുഞ്ഞി ബാവു വൈദ്യര്‍.കരുണാ വാരിധിയായ നാഥന്‍ അനുഗ്രഹിക്കുമാറാകട്ടെ.

കേരളത്തിലെ പ്രഗത്ഭരും പ്രശസ്‌തരുമായ പണ്ഡിത വര്യന്മാരുടെ ചികിത്സാലയമായി തൊയക്കാവ്‌ മുട്ടിക്കലിനടുത്തുള്ള മേനോത്തകായില്‍ അറിയപ്പെട്ടിരുന്നു.പരമ്പരാഗത ആയുര്‍വേദ ചികിത്സാ രംഗത്തെ കുലപതികളുടെ പാരമ്പര്യം ശ്രേഷ്‌ഠമായി നില നിര്‍ത്തിപ്പോരുന്നതില്‍ തൊയക്കാവ്‌ മേനോത്തകായില്‍ വൈദ്യ കുടും‌ബത്തിലെ നാലാം തലമുറക്കാരില്‍ പ്രഗത്ഭനാണ്‌ ഡോ.അബ്‌ദുല്‍ ഹഫീദ് മുഈനുദ്ധീന്‍.

ഹാജി കുഞ്ഞി ബാവു വൈദ്യരുടെ മകന്‍ മുഈനുദ്ധീന്‍ വൈദ്യരുടെ മകനാണ്‌ ഡോ.ഹഫീദ്‌.മധ്യേഷ്യയിലെ എമിറേറ്റ്‌സ് കേന്ദ്രീകരിച്ചുള്ള ആയുര്‍ വേദിക് സെന്ററിലാണ്‌ ഡോ.ഹഫീദ് സേവനമനുഷ്‌ഠി്‌ക്കുന്നത്.പരമ്പരാഗതവും ആധുനികവുമായ ചികിത്സാ സമ്പ്രദായങ്ങളില്‍ ഗവേഷണങ്ങളും പഠനങ്ങളും നടത്തിയ ഡോ.ഹഫീദിന്റെ വിലപ്പെട്ട സം‌ഭാവനകള്‍ ആരോഗ്യലോകം അംഗികരിക്കുകയും ആദരിക്കുകയും ചെയ്‌തിട്ടുണ്ട്‌.

പാരമ്പര്യ വൈദ്യ കുടും‌ബത്തിലെ രണ്ടാം തലമുറയിലെ മറ്റൊരു പ്രശസ്‌തനായ ബാല ചികിത്സാ വൈദ്യനാണ്‌ മുഹമ്മദ്‌ കുട്ടി വൈദ്യര്‍.ഇദ്ധേഹം കരുവന്തലയില്‍ സേവനമനുഷ്‌ടിച്ചിരുന്നു.ഏനാമാവ്‌ മുപ്പട്ടിത്തറയിലാണ്‌ താമസം.

വൈദ്യ കുടുംബത്തിലെ കുലപതി അമ്മുണ്ണി വൈദ്യരുടെ മകളാണ്‌ അസീസ്‌ മഞ്ഞിയിലിന്റെ മാതാവ്‌ ഐഷ ഖാദര്‍. ഇന്ത്യക്ക്‌ സ്വാതന്ത്ര്യം ലഭിക്കുന്നതിനു മുമ്പത്തെ വിദ്യാഭ്യാസ കാലത്തെ അഞ്ചാം ക്ലാസ്സുകാരിയാണ്‌ തൊണ്ണൂറ്‌ കഴിഞ്ഞ ഐഷ.ഹാജി കുഞ്ഞി ബാവു വൈദ്യര്‍ സഹോദരനാണ്‌.മുപ്പട്ടിത്തറ ബാല ചികിത്സാ വിദഗ്ദന്‍ മുഹമ്മദ്‌ കുട്ടി വൈദ്യരുടെയും കണ്ണോത്ത്‌ ഷാഹുല്‍ ബാവുട്ടിയുടെയും പാടൂര്‍ അബ്‌ദുല്‍ റഹ്‌മാന്‍ കേലാണ്ടത്തിന്റെയും ഉമ്മമാര്‍ സഹോദരികളാണ്‌.അല്ലാഹു അനുഗ്രഹിക്കുമാറാകട്ടെ.


Sunday, February 26, 2017

ഉമ്മ എല്ലാറ്റിനും സാക്ഷി

ഉമ്മയും ഉപ്പയും ഞങ്ങള്‍ കുടും‌ബാം‌ഗങ്ങള്‍ 12 പേര്‍.രണ്ടാം തലമുറയില്‍ 34 മക്കള്‍.മൂന്നാം തലമുറയില്‍ 56 പേര്‍.നാലാം തലമുറയില്‍ 8 പേര്‍.ഇങ്ങനെ 110 മക്കളും പേരമക്കളും.വിവാഹ ബന്ധങ്ങള്‍ വഴിയുള്ള ഇണ തുണകള്‍ 41 പേര്‍.എല്ലാവരും കൂടെ 151 പേര്‍. ഇതില്‍ സഹോദരി ത്വാഹിറയുടെ മകന്‍ അന്‍‌വറിന്റെ ആദ്യത്തെ കണ്മണിയാണ്‌  നൂറ്റിയമ്പത്തി ഒന്നാമത്തെ അം‌ഗം.90 കഴിഞ്ഞ ഉമ്മ എല്ലാറ്റിനും സാക്ഷി.

Wednesday, February 8, 2017

ഒരു വഴിത്തിരിവില്‍

ജിവിതത്തില്‍ വളരെ പ്രാധാന്യമുള്ള ഒരു ദിവസം.അന്വേഷണ പാതയില്‍ തിരിച്ചറിവുകള്‍‌ക്ക്‌ അനന്യമായ തിളക്കം കൂട്ടിയ ദിവസം.അനുസരിക്കുന്നവര്‍ എന്നര്‍‌ഥം വഹിക്കുന്നവര്‍ ഒന്നുകില്‍ പാരമ്പര്യമായി കിട്ടിയ ആചാരാനുഷ്‌ഠാനങ്ങളുടെ തടവറയില്‍. അല്ലെങ്കില്‍ ഇതില്‍ നിന്നൊക്കെ തടവു ചാടി ഉറഞ്ഞു തുള്ളുന്നവരുടെ മൈതാനിയില്‍ അതുമല്ലെങ്കില്‍ മദമിളകാനും മദമിളക്കി വിടാനുമുള്ളവരുടെ ചൊല്‍‌പടിയില്‍. എന്നൊക്കെ വ്യാഖ്യാനിക്കാവുന്ന വര്‍‌ത്തമാന കാലഘട്ടത്തില്‍; വ്യവസ്ഥാപിതവും സന്തുലിതവുമായ മനോഹരമായ ദര്‍‌ശനം എന്ന വിവക്ഷയെ മനസാ വാചാ കര്‍‌മ്മണാ അം‌ഗികരിച്ച്‌ ആനന്ദാശ്രു പൊഴിച്ച ദിവസം.

കൗമാരം വിട്ടുണരുമ്പോള്‍ തന്നെ  ഒരു പരന്ന വായനയുടെ ശീലം എന്നെ പിടികൂടിയിരുന്നു.പത്താം തരം കഴിയുന്നതിന്നു  മുമ്പുതന്നെ വായനയുടെ ഒരു വലിയ ലോകത്തെ പ്രാപിക്കാന്‍ ഭാഗ്യം സിദ്ധിച്ചിരുന്നു.എഴുപതുകളുടെ അവസാനം ഇന്നലെക്കഴിഞ്ഞതുപോലെ മനസ്സിലുണ്ട്‌.ശുദ്ധമായ സംസ്‌കാരത്തോട്‌ ആയിരം കാതം ബന്ധം പോലുമില്ലാത്ത ഒരു വികൃതമായ സംസ്‌കൃതി ഇഴപിരിഞ്ഞു കിടക്കുന്നാതായി അനുഭവപ്പെടുമായിരുന്നു.എന്നോടൊപ്പം ഇത്തരം ചിന്തകള്‍ പങ്കുവെക്കുന്ന വേറെയും സഹോദരങ്ങളും ഉണ്ടായിരുന്നു.

വായനയും പഠന മനനങ്ങളും നിരുത്സാഹപ്പെടുത്തുക,വിജ്ഞാന സമ്പാദനത്തില്‍ ലിംഗഭേദം കാല്‍പ്പിക്കുക,വിശുദ്ധ വേദത്തിന്റെയും പ്രവാചകാധ്യാപനങ്ങളേയും കവച്ചു വെക്കുന്ന വിധം കേവല ഐതിഹ്യ സമാനമായതിനോട്‌ കൂടുതല്‍ കൂറു കാണിക്കുക തുടങ്ങിയ വൈകൃതങ്ങളാണ്‌ എന്നെ ഏറെയും വേദനിപ്പിച്ചിരുന്നത്‌.നമ്മുടെ പരമ്പരാഗത സംവിധാനം മനസ്സിനെ വേപഥുകൊള്ളിച്ച വിഷയങ്ങളില്‍ അത്ഭുതപ്പെടുത്തും വിധം ഭാവമാറ്റത്തോടെ സം‌ഘങ്ങളും സം‌ഘടനകളും കുറെയൊക്കെ മുന്നോട്ടു പോയിക്കൊണ്ടിരിക്കുന്നു എന്നത്‌ ഏറെ സന്തോഷ ദായകമാണ്‌.
ഒരു വഴിത്തിരിവില്‍ ഒന്നു പുറകോട്ട്‌ തിരിഞ്ഞു നോക്കി എന്നു മാത്രം.